Mae’r mudiad BLM yn golygu lot i mi. Rydw i eisiau i ni gael ein cydnabod, ein cynnwys, a’n parchu yn ein cymuned, dim ots pa liw ein croen neu wlad enedigol.
Nid mudiad Americanaidd yn unig mo Mae Bywydau Du o Bwys, mae’n fyd-eang: mae hiliaeth yn bodoli yn fyd-eang. Mae’n frwydr fawr y mae’n rhaid inni ei brwydro’n ddyddiol a’i chefnogi ym mhob ffordd bosib. Mae angen inni gydsefyll a chael clywed a chydnabod ein lleisiau.
Pan glywais fod ein chwaer Iolanda am drefnu’r brotest, roeddwn i’n gwybod bod yn rhaid i mi fod yn rhan o’r peth oherwydd ei fod yn fater sy’n peri pryder nid yn unig i mi ond fy holl frodyr a chwiorydd sydd wedi dioddef gwahaniaethu. . Gwelais y brotest fel cyfle i ni ddod ynghyd mewn undod i godi llais yn erbyn hiliaeth ac ymladd dros ein hawliau.
Roedd gweld George Floyd yn cael ei drin fel y cafodd yn boenus ac roedd yn alwad i ni fod mwy i’w wneud. Wrth gwrs, mae yna ffordd bell o’n blaenau ond rydym wedi cychwyn ar y daith o gael yr hyn y mae ei eisiau arnom, sef diwedd ar hiliaeth a gwahaniaethu.
Cefais brofiad a oedd yn wirioneddol drist i mi ac roedd yn ystod y dyddiau ar ôl Brexit. Es i’r ystafell ffitrwydd yn Wrecsam i wneud fy ymarfer corff arferol, a thra’r oeddwn i wrthi, clywais ferch Brydeinig yn dweud wrth ei ffrindiau ‘O, maen nhw’n dal o gwmpas’. Cefais sioc oherwydd eu bod wedi meddwl y byddai pobl Ddu yn mynd yn ôl i’w gwlad ar ôl Brexit a doedden nhw ddim yn disgwyl fy ngweld i a’r ddynes arall yno.
Dw i wastad wedi bod yn berson sydd eisiau byw mewn cymdeithas deg a dwi’n cofio pan o’n i ym Mhortiwgal, ymunais â llawer o brotestio gan fod gwahaniaethu a hiliaeth yn gyffredin iawn yno hefyd.
Mae’n bwysig iddyn nhw wybod bod angen i ni ymladd bob dydd i fod yn rhan o’r gymdeithas yr ydym yn byw ynddi a chael parch ynddi. Felly, fe ddwedwn i, daliwch ati i frwydro er mwyn y genhedlaeth nesaf, a’r un wedyn. Peidiwch â gadael i neb eich cam-drin ac os byddwch yn profi hiliaeth, gwahaniaethu, neu gamdriniaeth, peidiwch â chadw’n dawel, siaradwch amdano ac ewch i gael y gefnogaeth angenrheidiol.
Dim Cyfiawnder, Dim Heddwch.
